تجربة ضياع الوثائق الشخصية من أصعب التجارب إلي نجمو نعيشوها في حياتنا اليومية. حاجة تنجم تصير لأي شخص فينا في أي وقت، لا قدّر الله.

ومن أهم الوثائق إلي تخلقلنا برشا مشاكل كـ تضيع أو تتسرق هي رخصة السياقة. رخصة السياقة إلى نعيشو في جرتها برشا تعطيلات لأنو أغلبنا ما يقدرش يستغنى على الكرهبة في تنقلات العائلة والقضيات الشخصية وفينا شكون يرتبط بيها مصدر رزقه الأساسي. لهذا فإنه عملية إعادة إستخراج رخصة السياقة مهمة ياسر ولازمها تصير بسرعة. لكن للأسف برشا ناس ما يعرفوش الإجراءات وتتعقد علاهم الأمور وهو ما يخليهم يتعطلو في إعادة إستخراجها وتتوقف مصالحهم لأيام وأيّام. لهذا "إدارتي" حاولت تجمع الإجراءات المتعلقة بتجديد رخصة السياقة وتشرحها في ثلاث خطوات بسيطة:

  1. أولا: لازم تتوجه في أقرب وقت لمركز الشرطة وتستخرج شهادة ضياع. الشهادة لازم يكون عمرها أقل من شهر وقت تسليم الملف.
  2. ثانيا: لازم تتوجه في أقرب وقت لطبيب وتاخو شهادة طبية مطابقة للنموذج الجاري به العمل. الشهادة لازم يكون عمرها أقل من 3 أشهر في صورة انتهاء صلوحية الرخصة أو الحالات إلي تبقّى من صلوحية الرخصة مدّة ما تزيدش عن ثلاثة أشهر عند تاريخ إيداع الملف.
  3. ثالثا: تتوجه إلى أقرب وكالة فنية للنقل البرّي، تعمر مطلب الحصول على رخصة سياقة وترفقه بنسخة من بطاقة التعريف الوطنية أو أي وثيقة معادلة بالنسبة للأجانب، زوز تصاور تعريف جدد، وصل في دفع المعاليم المستوجبة وما تنساش شهادة الضياع بالطبيعة.

ملاحظة: بالنسبة للغير مقيمين في البلاد التونسية، إضافة إلى تقديم شهادة الضياع، يلزم تقدّم شهادة مسلمة من طرف السلط الأجنبية المكلفة بتسليم رخص السياقة بالبلد الّي يقيم فيه. تثبت هذه الشهادة أن الرخصة ما وفاتش صلوحيتها وماهيش مفكوكة (ليست موضوع سحب) كما أنو مقدم الطلب ما قامش بتعويض رخصة السياقة التونسية برخصة أجنبية.